អតីតកំពូលអ្នកប្រដាល់គុនខ្មែរដ៏ល្បីបំផុតមួយរូប របស់កម្ពុជា លោក អេ ភូថង ត្រូវបានរកឃើញថាវិជ្ជមានកូវីដ ១៩ ខណៈដែលបច្ចុប្បន្ន កំពុងតែសម្រាកព្យាបាលនៅពហុកីឡដ្ឋានជាតិអូឡាំពិក ។
ចំពោះដំណើរដើមទងនៃការកើតកូវីដ ១៩ នេះ ត្រូវបានឱ្យដឹងថា កាលពីថ្ងៃទី ១១ ខែកក្កដា ឆ្នាំ ២០២១ កន្លងទៅ លោកឡើងជាតិអាស៊ីតខ្លាំង ដោយត្រូវទៅសម្រាកព្យាបាលនៅមន្ទីរពេទ្យ ។ តែក្រោយពីបានធូរស្បើយ លោកត្រូវបានពេទ្យតម្រូវឱ្យធ្វើសំណាក ស្រាប់តែលទ្ធផលចេញមកវិជ្ជមាន ។ ដោយមកទល់នឹងពេលនេះ លោកបានធូរស្បើយខ្លះហើយ តែមិនទាន់អវិជ្ជមានកូវីដ ១៩ ឡើយ ។
គួរឱ្យដឹងដែរថា អេ ភូថង មានជម្ងឺប្រចាំកាយជាច្រើនមុខ ដូចជា ខ្លាញ់រុំបេះដូង លើសជាតិអាស៊ីត លើសជាតិស្ករ និង សម្ពាធសសៃបេះដូង ដែលបណ្តាលមកពីការធាត់ជ្រុលរបស់លោក។
យ៉ាងណាមិញក្រោយពីឃើញការលំបាកបែបនេះស្រាប់តែថៅកែពេជ្រ ទ្រី ដាណា បង្ហោះសារជួយបែបនេះភ្លែតថា៖ “មើលទៅជីវភាពគាត់មិនល្អប៉ុន្មានទេ ហើយមកកើតកូវីដ១៩ ទៀត 😥😥😥 កាលខ្ញុំនៅក្មេងល្បីឈ្មោះគាត់ណាស់ ស្ដេចប្រដាល់ស្រុកខ្មែរ អេ ភូថង អ្នកណាក៏ស្គាល់ដែរ ទោះខ្ញុំមិនមែនអ្នកមើលប្រដាល់ក៏ស្គាល់គាត់ដែរ។
ខ្ញុំជួយដោះស្រាយជីវភាពគាត់ 1000$ ចាំឱ្យក្រុមការងារប្រគល់ជូនប្រពន្ធគាត់។ សង្ឃឹមថាឆាប់ជាសះស្បើយ ឆាប់បានមកបង្ហាត់សិស្សវិញ🙏🙏🙏”៕
0
0
20
20
