ភ្នំពេញ៖ បើរំឭកកាលពីកំឡុងឆ្នាំ ២០០៤ មហាជនអ្នកទស្សនាខ្សែភាពយន្តអប់រំរបស់ស្ថានីយទូរទស្សន៍ប៉ុស្តិ៍លេខ ៥ ប្រាកដជាធ្លាប់បានទស្សនាហើយនូវខ្សែភាពយន្តភាគរឿង «រសជាតិជីវិត» ដែលមានការសម្តែងដោយអ្នកនាង កែវ ពេជ្រពិសី, លោក កែវ ង៉ែត (បូរ៉ា), លោក សារ៉ា ចិន្ត្រា (ពិសិដ្ឋ), អ្នកនាង ម៉ែន ម៉ាឡៃ, អ្នកនាង គឹម សុធាថងឌី (កញ្ញា) និង លោក អ៊ឹង សុក្រធារិទ្ធ (ដុកទ័រ រិទ្ធ) ជាដើម។
ក្នុងនោះ មហាជនអ្នកគាំទ្រច្បាស់ជាចាំមិនភ្លេចនោះទេនៅចុងបញ្ចប់នៃរឿង ដោយតួអង្គ ដុកទ័រ រិទ្ធ បានកាន់ផ្កាមួយទងឡើងភ្នំបាខែងដើម្បីរកអ្នកគ្រូពេទ្យ ម៉ាឡៃ សារភាពស្នេហ៍ ដែលឈុតឆាកនេះបានធ្វើឱ្យអ្នកនិយមតាមដានសប្បាយរីករាយចិត្តយ៉ាងខ្លាំង ពេលឃើញតួអង្គទាំងពីរបានត្រូវរ៉ូវស្រឡាញ់តាមការចង់បានពីអ្នកគាំទ្រដែលរំពឹងទុកនោះ ។
រយៈពេលប្រមាណ ១៧ ឆ្នាំមកហើយ ដែលរឿង «រសជាតិជីវិត» បានបញ្ចាំចប់ ដោយនៅសល់តែចំណងជើងស្ថិតក្នុងការចង់ចាំប៉ុណ្ណោះ នេះ ហើយបើនិយាយពីតួអង្គវិញ មកទល់បច្ចុប្បន្ននេះក៏មានការប្រែប្រួលខ្លាំងណាស់ដែរ។
ចំពោះតួអង្គ ដុកទ័រ រិទ្ធ ក្រោយពីរឿងបានបញ្ចាំងចប់ គេបានឃើញលោកចូលប្រឡូកពេញដៃជើងក្នុងសិល្បៈ ដូចជាបង្ហាញវត្តមានក្នុងការសម្តែងរឿងនានា ចម្រៀងកាយវិការ និង ស៉្បតពាណិជ្ជកម្មមួយចំនួនផងដែរ ប៉ុន្តែមួយរយៈចុងក្រោយនេះ គេហាក់មិនសូវបានឃើញវត្តមានលោកសកម្មក្នុងសិល្បៈប៉ុន្មានឡើយ។
ទោះជាលោកមិនបានបង្ហាញវត្តមានសកម្មក្នុងសិល្បៈពិតមែន ប៉ុន្តែបើក្រឡេកទៅមើលគណនីហ្វេសប៊ុករបស់ ដុកទ័រ រិទ្ធ ក្នុងពេលបច្ចុប្បន្ននេះ គឺលោកនៅតែបន្តចាប់អាជីពលើវិថីសិល្បៈដូចដើម ដោយសព្វថ្ងៃលោកបានថតរឿងអប់រំខ្លីៗ
និងរឿងកំប្លែងក្នុងក្រុមនាយ ក្រឹម ប្រចាំនៅស្ថានីយទូរទស្សន៍បាយ័ន ។ ក្រៅពីការងារសិល្បៈ តួប្រុសក្នុងរឿង «រសជាតិជីវិត» រូបនេះ ក៏ជាអ្នករកស៊ីខាងអចលនទ្រព្យ និង ជាមន្ត្រីរាជការមួយរូបផងដែរ ។
គួរឱ្យដឹងដែរ ក្រោយសម្តែងក្នុងរឿង «រសជាតិជីវិត» និង ប្រឡូកពេញដៃជើងក្នុងអាជីពសិល្បៈមិនបានប៉ុន្មាននោះ ដុកទ័រ រិទ្ធ ក៏បានសម្រេចចិត្តបញ្ចប់ភាពនៅលីវ ដោយបានរៀបការភរិយាកសាងគ្រួសារ ហើយមកទល់បច្ចុប្បន្ននេះ លោកក៏ទទួលបានចំណងដៃកូនស្រី ២ រូបពីអាពាហ៍ពិពាហ៍ ជាមួយនឹងសុភមង្គលក្នុងគ្រួសារផងដែរ៕
0
0
20
20
